Buru osasuna funtsezkoa da bizitzako etapa guztietan, haurtzarotik zahartzarora. Hala ere, beharrak eta erronkak aldatu egiten dira urteekin, eta, askotan, ez dute merezi duten arreta jasotzen. Ideia hori abiapuntutzat hartuta, Agifesek “Buru osasuna, zahartzea eta adineko pertsonak” jardunaldia egingo du urriaren 22an Donostian, osasun mentaleko arazo larriek zahartze goiztiarrean duten eraginaz hausnartzeko eta arreta-zerbitzuak errealitate horretara nola egokitu daitezkeen aztertzeko helburuarekin.

Hizlariak

Osasun mentalaren eta adinekoen arloan eskarmentu handia duten hizlariak izango dira topaketan:

  • Gabriela Mondragón Olán, Matia Fundazioan neuropsikologoa, Egurtzegi proiektuaren barruan. Proiektu horrek mendekotasunarekin, psikogeriatriarekin edo dibertsitate funtzionalarekin loturiko profilak dituzten adinekoentzako zainketak eskaintzen ditu.
  • David Otaegui, Biogipuzkoako Neuroinmunologia taldeko zuzendaria, zeina zahartzeari buruzko zeharkako ikerketa-lerroan parte hartzen duen.
  • Estibaliz López de Munain Irungo Osasun Mentaleko Zentroko psikiatra, zeina Gipuzkoako Poliklinikako Neurozientzia Klinikoen Unitateko kidea izan den.
  • Iker Arrizabalaga Agifeseko psikologo eta Familien programaren arduradunak egingo ditu moderatzaile lanak.

“Zaindu dezagun buru osasuna bizitzako etapa guztietan”

Jardunaldia urriaren 10ean ospatzen den Buru Osasunaren Nazioarteko Egunaren harira antolatua izan da. Aurten, Buru Osasuna Euskadik “Zaindu dezagun buru osasuna bizitzako etapa guztietan” goiburua aukeratu du egun horretarako, arreta handiagoa behar duten bi adin-taldetan arreta berezia jartzeko: gazteak eta adinekoak.

Aurtengo kanpainak azpimarratu nahi du osasun mentaleko arazo larriak dituzten gazteei eta adinekoei zuzendutako laguntzak eta baliabideak indartzeko premia dagoela. Gainera, prebentzio- eta laguntza-baliabide gehiago eskatzen ditu adin-tarte horietarako, oso erronka desberdin baina premiazkoei aurre egin behar baitiete. Gazteen artean, gizarte-presioak, laneko ziurgabetasunak eta gehiegizko esposizio digitalak eragin larria izan dezakete ongizate psikologikoan. Zahartzaroan, aldiz, bakardadeak, gaixotasun kronikoek edo laguntza-sareak galtzeak areagotu egiten dute osasun mentaleko arazoak sufritzeko arriskua.

Premiazko konpromisoak dira babes-inguruneak sustatzea, ondoeza txiki-txikitatik prebenitzea eta bizitza osoan laguntza egokiak bermatzea. Esparru horretan, Agifesek antolatutako jardunaldia funtsezko ekarpena izango da elkarrizketa bultzatzeko eta herritarren benetako beharrei erantzungo dieten konponbideak aztertzeko.