Idatziaren alternatiba gisa, honakoa proposatzen du Feafesek: “arreta soziosanitario osoa eta egokia ez edukitzeak dakarren arrisku egoerari” erreferentzia egitea. Horrela, buruko nahastea automatikoki arriskugarritasunarekin parekatzea ekidingo litzateke. Horrez gain, Espainiako konfederazioak adierazi du proiektuak neurri guztiz diskriminatzaileak eta estigmatikoak barneratzen dituela. Buru gaixotasuna duten pertsonen eskubideak urratzen dituzte proposatutako neurriek, Minusbaliotasuna duten Pertsonen Eskubideen Nazioarteko Konbentzioarekin kontraesanean baitaude. Eta Espainiari, hitzarmen horren sinatzaile izanik, berau betetzea dagokio. Zehazki, inputatu ezin daitezkeen pertsonen ospitaleratze psikiatrikoak epe mugagabez luza daitezen proposatu izana kritikatzen dute. Halaber, buru gaixotasuna duten pertsonak, gauzatu ere ez dituzten delituak aurreikusi nahian, zaintzapeko askatasun erregimenean jarri nahi izatea salatu dute.  

 

Feafesek gutun irekia bidali dio Alberto Ruiz Gallardón Justizia ministroari. Bertan, adierazitako aldarrikapenak defendatzeaz gain, lege-proiekturako zuzenketa eta neurri terapeutikoak hartzeko proposamena gaineratu du. Horrez gain, konfederazioko hainbat ordezkari talde parlamentario guztiekin elkartu dira, buru gaixotasuna arriskugarritasunarekin parekatu nahi izatea zergatik ukatzen duten azaltzeko, eta buru gaixotasuna duten pertsonen eskubideak urratzen dituzten artikuluak aztertzeko.

 

Aurreikuspenen arabera, Zigor Kodearen aldaketa ez da ekainera arte onartuko, aldez aurretik talde parlamentarioek eztabaidatu eta zuzenketa partzialak bozkatuko baitituzte, artikuluz artikulu. Feafesek deia egiten die buru osasunaren arloan diharduten elkarte eta erakunde guztiei datozen hilabeteotan kolektiboaren eskubideak bermatzeko, Justizia Ministerioaren planteamenduekiko korronte kritikoa bultzatuz.